Mitali og 15 puntos si JP Dugenio sa dihang gigapos sa Saint Joseph ang Tisa Bulldogs, 42-39, sa nagpadayon nga Duterte Basketball League (DBL) 5-10 Under tournament sa Capitol Parish gym, Escario St., dakbayan sa Sugbo niadtong Dominggo, Septiyembre 4, 2022.
Sa iyang liderato, si Dugenio maoy napiling best player of the game alang sa ikaduhang kadaugan sa Saint Joseph.
Mipugnit usab ang Aquila Trading og daog sa maong adlaw pinaagi sa pagbitay sa Spartans, 47-39, ubos sa pagpangulo ni Ryle Sumilang kinsa mitapos sa duwa nga may 10 puntos.
Way kaluoy nga gipanglubong sa Bertech ug Gridlight ang ilang tagsatagsa ka mga kaatbang.
Ang Bertech nga nakakuha og 10 puntos gikan ni Kerk Dela Cerna, milampornas sa Chancellor, 70-45, samtang ang Gridlight nga nakapahimulos sa 19 puntos ni Bruce Tan yanong mipukling sa Defenders, 55-35.
Mao usab kini ang gibuhat sa T&T nga miwaras-waras sa V-Drink, 73-55. Si Barok Ceniza mihagdaw og 15 puntos nga may duha ka rebounds aron maoy napiling best player of the game.
Ang Vines, sa ilang bahin, nakaipsot sa mga kamot sa ZEEX Tailoring, 65-58; gilupig usab sa Weigen Motors ang Coco and Friends, 65-58.
Si Wenraye Enad maoy mibida sa Vines pinaagi sa iyang 16 puntos ug duha ka rebounds samtang wa usab magpabitin si John Patrick nga may 20 puntos ug duha ka steals.
Gipagang sa DCS International ang Snipers, 66-58, ug midaog usab ang RDT batok sa Toyota Mabolo, 74-47.
Ang torneyo nga anaa na sa ilang ikaupat nga Dominggo giorganisar ni sportsman Saddam Duterte. JBM
Caption: Nagpadayon ang aksiyon sa Duterte Basketball League (DBL) 5-10 under tournament sa Capitol Parish Church sa Escario St., dakbayan sa Sugbo. (Tampo nga hulagway)
